Azərbaycan News Agency

Qətər Xarici İşlər Nazirliyi İraqın Bəsrə şəhərində yerləşən Küveyt Dövlətinin Baş Konsulluğunun binasına qarşı davam edən hücumları və konsulluq nümayəndəliklərinin toxunulmazlığının pozulmasını pisləyib.

Nazirliyin bəyanatında qeyd olunub ki, konsulluq binalarına qarşı hücumlar beynəlxalq hüququn və 1963-cü il Konsulluq Münasibətləri haqqında Vyana Konvensiyasının açıq şəkildə pozulmasıdır. Bəyanatda həmçinin konsulluq nümayəndəliklərinin toxunulmazlığına hörmət göstərilməsinin və onların əməkdaşları ilə birlikdə tam şəkildə qorunmasının beynəlxalq öhdəlik olduğu vurğulanıb.

Qətər Küveyt Dövləti ilə tam həmrəy olduğunu bir daha bəyan edərək, konsulluq nümayəndəliklərinin təhlükəsizliyinin təmin olunması və bu cür hücumların təkrarlanmaması üçün bütün zəruri tədbirlərin görülməsinin vacibliyini qeyd edib.